الملل كلمة معناها "ماكو شغل" نوصل لـ مرحلة عقلنا يقول "قف" ..
يجبرنا على اتخاذ طريقة نكسر فيها الروتين اليومي ، في جمل مدري وين
قاريتها بما معناها خذ لك في السنة شهر إجازة .. وفي الشهر أسبوع ، وفي الأسبوع
يوم ، وفي اليوم ساعة .
أنا مسكت هاليوم وقررت آخذ ساعة منه ، فكرت أتسوق أو أشوف سينما أو أطلع
مع رفيجاتي وتذكرت كل هذا ممنــوع في بيتنا ، أمي عندها وجهة نظر ضروري
نلتزم فيها وهو البنت ما تطلع إلا لـ حاجة تقضيها وترد البيت في زمن معين
لا تأخر دقيقة ولا تقدم ثانية، وأنا أبي آخذ ساعة من كل يوم أروّح عن نفسي .
طلعت فكرة المشي في الحديقة يوميا قبل المغرب الساعة 6
لأني ما أحب أسوق في الليل !! ولا أحد يبي يمشي معاي مدري منو قالهم
المشي هو هُبْ هُبْ هُبْ بدون توقف !
( هب هب المشي على الطريقة العسكرية)
بديت من 5 أيام تقريبًا ، لكن إلي صار أمس في الحديقة غريب معاي شخصيًا :
كل يوم أمشي فيه ، أصادف ناس تمشي بين رياضيًا أو تخفيف وزن أو أصحاب
سكر وضغط . أنا آخذ الحديقة كاملة ، أغطيها مرة وحده وعلى بوّابة الخروج على طول .
وأنا أمشي صادفت واحد متكمم ( ملثم – متلطم اختاروا المعنى إلي تبونه ) بـ شماغ ،
أجبل علي وتخطّاني ، كملت مشيتي ( لاحظوا مشي رياضي قريب للسريع ) ، بعد فترة
جذي وأنا بعدي ما خلصت أجبل علي مرة ثانية وتخطّاني !! تبارك الرحمن مداك تلف
الحديقة مرتين وأنا يا حظي ما خلصت الدورة الأولى !! تكرر هالأمر كذا يوم ، وبيني وبينكم حفّزني
إنّي ما أخليه يتخطاني مرة ثانية إلا وأنا أنهيت الدورة الأولى ..
طبعا بالمشمش !! .. سواها فيني تقريبا 4 مرات .. وأمس اسم الله عليه شفته مجبل علي يبي
يكسر الرقم القياسي ويقطع الدورة الثالثة .... أول ما شفته من بعيد مسكت قلبي من الضحك
أقول لنفسي : "تكفى لا تسويها الله يخليك خلّك مكانك ، حرام تحطمني" ، ولو تشوفوني
أبي بس أبعد عن طريقه المهم لا يعدّيني .. ما قدرت واستسلمت للأمر الواقع وقعدت على
الكرسي كاتمه ضحكتي لين يمر ...هو مر من هني وأنا خلاص مت من الضحك ، مسكين يطالع
ملابسه ، شاك بعمره ، قمت وكملت مشيتي وإلا ذاك الصوت :
انتِ ما تقولين على شنو تضحكين ؟
ألتفت وإلا هو .. بلعت ضحكتي .. وتو بأحط عيني بعينه .. وإلا ضحكة ثانية مكتومة
في صدري على عيونه صغار حييل تقول نقط وبيده نظارته الطبية ، تذكرت سلّوم بـ
قطعة 13
ما عرفت أجاوبه يوم شافني جذي تنرفز وتحلطم مدري شقال وراااااح ...
أنا ركض على السيارة ، انفجرت هناك من الضحك لأني ما أقدر أضحك براحتي
في مكان عام ..تعوذت من ابليس .. ذكرت الله .. وشغلت السيارة ولا
قدرت أطلع .. واحد مسكر علي !! ... صج اسأل الله خير الضحكة .. شكل الضحك
بيطلع علي .. أذن المغرب .. اهني خفت .. أبي ألحق أوصل البيت قبل لا تظلم الدنيا
قفلت البيبان والدرايش .. ونطرت التعبان إلي مسكر علي ... شك بوم وإلا أشوف أبو عيون
نقط مجبل علي .. طلع هو صاحب السيارة .. سويت روحي ما أشوفه .. مجندسه ( تفخيم الجيم) 1
رأسي يعني أدوّر شي .. يه وطق جامتي : فيج شي ! .. عسى مو تعبانه ! ..
عجبني موقفه الشهم آآآآه بس ... ونزلت الجامه وأنا مبتسمة له وقلت : إنتْ
ما تقول اشلون صافط سيارتك جذي !! (نزرته ) .. خزني كأنه تحسف على سؤاله ..
وكل واحد فينا راح طريجه ..
اليوم قررت أمشي بعد المغرب ربع ساعة أو نص ساعة يعني يكون هو أكييد راح ..
والمفاجأة وأنا أمشي وإلا هو جدامي .. لا إراديا قلت إنتْ وهو قال ولييييييه
وأنا ما خلص منج .. غيرنا التايم يبه .. قلت وأنا بعد .. سألني ليش ضحكت
أمس .. الشغلة وايد مضايقته .. فهمته الموضوع .. ضحك وقال : تدرين
أنا حاطج تحدّي .. ؟ كل ما عديّج ، أحس إنّي سويت إنجاز وأمس
شدّيت على نفسي أطوفج 3 مرات .. اهني ابتسمت له بهدوء وقلت
الله يوفقك ومشيت .. لحقني وسأل إذا بأيي باجر .. جاوبته " خليت المشي لكْ."
ردّيت عليه بـالطريقة هذي عشان لا يتعرّف علي لو شافني .
تحديث : نكمل السالفة :
بعدت عنه وطلع بطريقي واحد مُصَك ، ياربي تقول منطاد
كبير من فوق و مجكنم من تحت ، وقف بنص الدرب ، طبعا شفت جذي وإلا آخذ فوق تحت
رجعت ، خلّاني ؟ وراي وغلاتكم .. عاد مغازل سخيف الله يلوع جبده ..
يالحلوة .. 1 و 2 و3 .. ويخربط بالحجي .. مالت عليه .. سرّعت خطوتي ..
وبيني وبينكم خفت .. تخيلته دب يطارد فريسه .. ممكن بأي لحظة يهجم .. وأنا الله خير
أصير بين إدينه حبة خال ! ..
شفت بو عيون نقط .. سلّوم (لقب) .. يهذر بالتلفون هو شافني قلت بس الحين ينقذني
.. أبدًا عطاني ظهره .. أعتقد متشمت فيني ... والله من غلات الروح .. هرولت لين وصلت عنده
قلت : وينك ياخوي أمي تبي تحاجيك .. وأنا ألقط بأنفاسي .. هذاك على باله أخوي صج ..
لو تشوفونه .. بقدرت قادر قام يركض .. صج حصلت هزّه أرضية .. بس ما عليه ..
وأنا أطالع فيه لين شفته راح .. وأتنفس وااااي مو مصدقة .. وأطالع وإلا الحبيب يضحك
تصدقون قال : تستاهلين !! حق ما حقرتيني .. !! .. قلت له : ليكون انت علاء الدين
وحكّيت المصباح وخليت هالمارد يلحقني !! .. الأخ مو معاي غشى من الضحك ..
مالت الحين أنا خايفة وإنت تضحك ..تدري اشلون .. ما راح تشوفون رقعت ويهي
قال : متأكدة .؟... مشيت وخليتــــــه .. سليحط ..
وصلت السيارة ومعصبة حدّي .. شغلتها أطالع ورى وإلا ................
سيارة مسكرة علي .. وربي مت خوف .. قلت لا يكون المارد هو صاحب السيارة
والله رحت من جيس أهلي .. على طول ألو ألو .. ولأن حظي مغلق .. كل إلي اتصلت
عليهم مشغول أو ما حد يرد .. يا ربي شسوي .. تووووووووووبة أكسر الروتين ..
لازم نتذمر على النعمة !!.. قعدت بالسيارة وسكرررررت كل الأبواب .. وشغاله
مسجات على كل معارفي في حال ما رديت البيت .. جذي جذي قصتي ..وأبجي بعد
تو حطيت راسي على السكان .. وإلا الجامه تنطق .. صرخت بقوة .. طلع منو صاحب السيارة ؟
سلّّّوووووووووم ... نزلت من سيارتي : عمّى وعمّى وعمّى مع حذفه بـ علبة الكلينكس مره
وقوطي الماي مره .. لين ما وصلته سيارته ..انت وبعدين معاك .. ما عندك غيري
موتني والله .. وهو يضحك .. طقيت جامته .. حرّك حرّك .. حسبي الله عليك ونعم الوكيل فيك
ياعل أشوفك نسخة مستنسخة من ترهلات يوكازونا ..
اهني الروح ردت لي .. ركبت السيارة وتو ما طلعت من المواقف وإلا المارد جدام
سيارته يطق طق بالتلفون .. رفعت طرف شيلتي أغطي الجزء المقابل له ..
وارتحت بعد ما طالعت المرايه الداخلية والمارد للحين واقف مع سيارته ..
على فكرة أول ما خفت شغلت إذاعة القرآن الكريم .. الحين حوّلت على إف إم الكويت لوووول
أمزح معاكم .. مستانسة وبس .. وصلت البيت وأنا نازله
وإلا سلّوم كان يلاحقني : ديديديديدي ... بطل الجامة .. وقال : حمدلله على السلامة بعد
بيتج وصلناج .. ومشى .. اشلون أفسر لكم إحساسي .. حبيته حب من أول خرعه
لووول .. دخلت بيتنا مستانسة .. وهيهات تظل الوناسة على ويهي ..
البيت مقلوب فووووق تحت .. أول ما شافوني.. خذوا سويج السيارة ..
عطوا المجال لأمي تلقي محاضرتها قائلة :
لا .. فشلة ما أقدر أكتبها .. تعرفونها ..
صفحة 50 من كتاب " كيف تزف عيالك "
لووول ..
روميه
*
*
معاني المفردات لغير الناطقين باللهجة المحلية :
ماكو : لا يوجد
لا أحد يبي يمشي معاي : لا أحد يريد مرافقتي
أجبل علي : أتاني من الأمام
جذي : هكذا
طبعا بالمشمش : كناية عن استحالة حدوث الشي .
سوّاها : فعلها
تكفى لا تسويها : أسلوب رجاء
بس : فقط
لين يمر : حتى يمر
مر من هني : مر من هنا
شنو : ماذا
أحط : أضع
سلّوم : شخصية كرتونية في مسلسل كرتوني قطعة 13 .
واحد مسكر علي : يضع سيارته بطريقة يصعب تجاوزها
صج : فعلا
الدرايش : جمع دريشة أي النافذة
مجندسة (تفخيم الجيم) : أنظر للأسفل
يه وطق جامتي : أتى و طرق زجاج نافذة السيارة .
فيج شي : سؤال / هل من مكروه
اشلون : كيف
نزرته : انفعلت
تحسف : من الحسافة أي نااااادم .
حاطتج : أضعكِ
أطوفج : اتجاوزكِ
باجر : من باكر ..غدًا
مُصك : رجل مفتول العضلات
مجكنم : صغير الحجم
خلُاني : تركني
يهذر بالتلفون : يثرثر بالتلفون
أطالع ورى : أنظر إلى الخلف
شغاله مسجات : مستمرة في إرسال رسائل قصيرة
السكّان : مقود السيارة
يا عل أشوفك : عسى أن أراك .. استهلالية دعااااء
يوكازونا : مصارع يقولون مات مشهور بوزنه وكرشته الجميلة لووول ، ابحثوا عن صورته في قوقل .
شيلتي : الشيلة غطاء الرأس
فشلة : إحراج
سويج : مفتاح
لووول: هههه أو خخخخ
