Thursday, November 04, 2010

روميه والريّال مدريد


في الليلة الماضية ، وعدتُ أخي أن أتابع بالنيابة
عنه مباراة ريال مدريد الأسباني وإي سي ميلان الإيطالي

على أن يذهب إلى الفراش ويستعد لاختبار اللغة الانجليزية
وسأنقل إليه جميع الأحداث وأخبره بها في الصباح الباكر
كي يشارك زملاءه النقاش ولو بخلفية يسيرة


حضّرتُ وجبة خفيفة تتكون من عصير ومكسرات
الرفاعي وجلستُ أنتظر المباراة .

بدأت المباراة والمعلق يتحدث بسرعة وصوته مزعج
( معلق الجزيزة الرياضية ) لذا أدرتُ القناة إلى أخرى
بمعلق أجنبي ، ويا للهدوء!! ، والتعليق البسيط ، وسماع
صوت الجماهير ، بالفعل جو يشجع على المتابعة .

أشاهد اللاعبين ينتقلون بالكرة ، إلى اليمين مرة ثم
تقطع وإلى اليسار مرة أخرى ثم تقطع وهكذا ،
وأميل معهم بنظري وأتساءل :
ماذا يعجبهم بـ كرة القدم ؟!؟!؟!؟
لكن تلاشى السؤال وسط اللعب الممتع
والخشن أحيانا والذي رحّب بالبطاقات الصفراء.

في الصباح ، وعند وجبة الإفطار دار الحوار التالي بيني وبين أخي :
--------------------------------------------
أخي : روميه سولفي عن مباراة أمس ، لا تسكتين
أبي بالتفصيل .


شوف يا خوي ، المباراة كانت حلوة ، والريّال مدريد
بغى يخسر جدام المايل بي بي سي .


ريال مدريد وإي سي ميلان يا روميه .

إي هذا هو ، المهم ، الشوط الأول اللعب فيه عادي
، كذا لاعب من الميلان أخذ أصفر ويمكن واحد ما
ثبّت ، وقبل لا يخلص الشوط قوّلوا المدريد.


هيّا !! ، زين منو إلي حط القول؟

كوكين صلحها لماكرينا..

كوكين !! ..آآآآ ..
قصدج هيجوين ...صلحها لدي ماريا؟

إييييي ، هجوين ...

تمام ، والشوط الثاني ؟

الشوط الثاني عجييييب ، ميلان ما خلوهم ، وراهم على ما يابوا التعادل ..

صج؟ اشلون؟

أقولك ، ابراهيم من غير وش شاتها ..و

لحظة .. اسمه ابراهيموفتش ..

إيييي ابراهيموفتش ، شاتها وإلا يصدها كاريسكاس

اسمه كاسياس يا روميه ..

يعني اشلون ما أكمل !! اصبر علي اشوي .. صدها
كاسياس واييك مهاجم ميلان ويعطيهااا راس قوووووووول.

عسى راسه للكسر ، وبعدين؟

ليش تدعي على الريّال ، للعلم هالهدف هو إلي شدني للمباراة ...

زين زين .. اشصار تالي ..

الي صار يا محفوظ السلامة ، ريال مدريد ، حاول وحاول
يبي اييب الفوز ، بس وين.. روح يا ميلان
واشلع قلوبهم بالثاني .... حتى المهاجم قص على كابرس
أقصد كاسياس وحذفها من تحته والأخ نط فوق ...
(شكلها تسلل ، والله أفهم بالكرة ؟ )


روميه ، حريتيني ، اشسووا ريال مدريد ...

لا تخاف يعجبونك ، أي على فكرة مدربكم بوريو ..

مورينووووو يا رووووميه ..

إي مورينو طلّع هيجوين ودخل اكزيما ، ويمكن طلّع
مزعل بعد ...


هاهاهاي كنتِ تشوفين مباراة وإلا مسلسل بدوي ، اسمه
أووووزززيل ، والثاني بن زيما مو اكزيما ..


يا معوّد ... أسماؤهم عويه ...بعدين عندكم سامي خضيره فما استبعدت الثاني مزعل ..
حاصله قبل لا يخلص الشوط الثاني .... استانست قلنا خلاص بفوزون
ميلان ..بسسسس أخخ ... مدري من وين ياك اكزيما
أقصد بن زيما ووعطاها لبدرو و ياب التعادل .. لحظة مدري أهو أو ماكارينا .

ماكارينا !! دي ماريا دي ماريا ....

أي ولد ماريا ، الخلاصة ، انتهت المباراة بالتعادل
2-2 .


الحمدلله أحسن من الخسارة ..



أهداف المباراة :

------------------------------------

أعتقد أنّكم ومن خلال الحوار استنتجتم افتقاري
إلى الإثراء الرياضي وخصوصا كرة القدم ، ومتابعتي
لها غالبا ما تكون للأسباب التالية :
وعد ( كـ الموقف السابق). 1
مشاغبة ( أشجع الفريق المنافس لفريق الشعب
والذي تسفر عن خسائر مادية ومعنوية ) 2
مساندة ( كأن أكون مع المشجّع الضعيف ضد
المشجّع المبلتع ) 3

وهذا لا ينفي حبّي لكرة القدم فـ هو امتداد
لـ حبّ أخوتي لها ومشاركتهم في اهتماماتهم .

بالأمس القريب ، أقيمت بطولة تصفيات كأس العالم
(إن لم يخب ظني) للسيدات في البحرين وبمشاركة
فرق عربية نسائية ، شارك من الخليج كل من البحرين وقطر .
استمتعتُ بلعبهن الهادئ ومحاولتهم إثبات جدارتهن في رياضة كرة القدم.

وبيني بينكم ، وبحضور والدتي قلتُ لأختي الكبرى
متى سيأتي اليوم الذي أرى فيه منتخب الكويت
النسائي أيضا ؟ .. طبعا وقبل أن تجيب أختي
تلقيتُ بالبريد العاجل وسادة كانت بالأصل تستخدم
للإتكاء ، بعد تحليقها من كف أمي ووصولها
سالمة على رأسي وقالت :
هذا الي ناقص بعد !!!!
بناتنا يراكضن ورى
الكورة !!! .


ولأن النقاش مع أمّي لا جدال فيه ، اكتفيتُ
بإبداء رغبتي ( مازحة ) أن أكون حارس مرمى
، وهذا ما يفسر طيران كل الأشياء الصلبة
واللينة تجاهي.

*
*
اشرايكم في كرة
القدم النسائية؟

14 comments:

chandal/danchal!! said...

شهالبوست يا رومية
لوووووووووووول
:)))

غشيت من الضحك

واي شي عجيب التعليق والنقل بالاسماء
انصحج تنضمين حق القناة الثالثة

اصلا اذا في معلقات رياضيات بهالموهبة انا ابصم بالعشرين حق الفريق النسائي
:)


بس تبين نصيحة
تأكدي من صلاحية المكسرات والعصير
شكلها وحدة منهم منتهية صلاحيته

نهارك عسل رومية

البوست عدل مزاجي
:***

حنان الحبشي said...

هههههههههههههههه
ههههههههههههههههه
والله مو طبيعية ... كنت بأعلق بالدوام
ما قدرت .. الله يقطع ابليسج

الا اكزيما ها هههههههه

انا مع الاخت chandal
اذا انتي المعلقة .. بتشوفين الكل يتابع المباراة ههههه

بعدين عن العياره ذاك اليونم قايله اسماء اللاعبين عدل .. الظاهر تبين تونسين اخوانج على الصبح
:p

الحين أختبرج مدرب برشلونة شسمه؟

وكرة القدم النسائية ...أنا موافقه عليها شرط تلعبين معاهم ... :D


الله يسعدج ويونسج مثل ما ونستينا
حبيبتي والله

~حَدِيـثُ الفَـجْـر~ said...

لوووووووووووول
روميه شالله حادج اجابلين مباره
من صجج انتي
انا يتلوني تل وبقضبوني ويترجوني
لا اغصبهم على طلعه وسينما وعشى
عشان ارضى اقعد

>> ياا اخي ما ادري شفيهم اخوانا الا نقعد معاهم بالمباره ونشوف غصب =\

اقوول وانا بعد بفلعج بكل شي يمي
عاد لقيتي بناتنا يلعبون كره
كلها صرااخ بصرااخ
اذا الريايل ما سلموا تبين البنات يطلعون سنعين فيها

و شنو هالاسماء
صرااحه ما ابي اقوول شي لاني انا بعد ما اعرف وله شي عنهم

تعالي
لا يكون هذي مباره امس
اقول حق اخوي النحيس وخر ابي افرفر بالتلفزون شوي .. ماخذه بريك من الدراسه بس ربع ساعه متنيحس مو راضي يقوم يقول لي هذي المباره تصير كل اسبوع وترك

ويعني ؟؟

ربي يسعدج ياروميه

و اقوول عن المعااير زين ؟

Anonymous said...

Its so funny
You make my day and make me smile like the sun
When i see Real Madrid I will remember your comments LOL

About women football why not!
but if you play with them or as the sisters said :


اصلا اذا في معلقات رياضيات بهالموهبة انا ابصم بالعشرين حق الفريق النسائي

وكرة القدم النسائية ...أنا موافقه عليها شرط تلعبين معاهم ... :D


Thanks for all Romia
I miss you so much

Guess who I am ?

: )

صفحات مُلطخّة بحروفي said...

" أكزيما "
لوووووووووووووووول ،
موّتّيني من الضحك !
-
نفس حالتي ، آنه صرت خبيرة بأسامي اللاعبين والأفرقة من اخواني .
-
البوست حدّه حلو ويضّحك .
ومُناسب جداً ليوم الخميس ^^

Romia Fahed said...

رايج جذي جندل؟

عاد ودّي أعلّق على مباراة ، وأكون الأولى في هذا المجال .

بعد عمري والله .. شجعيني أكثر... بعد تعليقج كبر الطموح أبي أصير حكم رايه
لووووول



عساه دوم هالضحكة
:*

Romia Fahed said...

حنان ..

يكون بتصيديني ... مدرب برشلونة اسمه
غووووريلا لووووووووووول

أتغشمر غورديولا

امممممم زين موافقة .. بس اقنعي أمّي
:$

عساها دوووم هالضحكة حنّون

Romia Fahed said...

فجورة أخوي ثانوية عامة وما أبيه يسهر ووراه امتحان عشان جذي شفتها

لييييش؟ كرة القدم توننس ، إنتِ تعالي معاي وأخليج تغيرين رايج
:p

إي أمس مباراة ريال مدريد وإي سي ميلان ... بعدين طالعيها معاه وناشبيه عليها قمة الوناسة لووول


لا خلاص ما عاير بس قومي درسي
:p

حياتي والله

Romia Fahed said...

غير معرف



أنا ما أنفع ألعب في كرة القدم لسبب بسيط أمي مو موافقة وقبلها الأسرة كلها ...وزيد عليها مهارة مافي لعب سنع مافي ..

وايد مستانسة على وناستكم ..

آسفة والله ما عرفتكم .. : )

دمتم لمن تحبوا

Romia Fahed said...

صفحات ..

إي غصب طيب دشين مود مع أخوانج ، وبالذات لمّا تشوفين الوالدة حاشرتهم لا طلعه ولا دخله عشان الدراسة ، فماكو سيرة إلا الدوري الأسباني ودوري أبطال أوروبا ..الخ

عساها ضحكة دوم مو يوم

دمتِ لمن تحبي

Anonymous said...

Joseph Dar.

ebtsamh said...

خوش أسماء أذرب من اسمائهم الاصلية

ضحكتيني والله

تابعي معاي مباراة القادسية اليوم

بس بليز من غير تغيير اسماء اللاعبين :)

جمعة مباركة

Romia Fahed said...

جوزيف درويش؟؟؟؟؟

كيف حالك يا رجل؟
أين ذهبت وفيما غيابك ؟!
وكيف حال ماريا وكارلا ؟
وصلني أنباء غير سارة وأرسلتُ إيميلًا منذ منذ شهر تقريبا أستفهم عن صحتها ولم ترد

شيك إيميلك الآن .. أتمنى لقاءك قريبًا

دمتَ لهن ولمن تحب

Romia Fahed said...

أذرب ! ،رفعتي معنوياتي ابتسامة
:$

صج اليوم القادسية؟ غريبة ما بلغوني الشباب ، يمكن عشاني العرباوية الوحيدة في البيت .

تقولين فيها ، ذاك اليوم أقولهم بدر ندى ومساعد المطوع :p


دمتِ لمن تحبي