لا تبعديني عنك

أمي تسألني ليش سهرانه للحين؟ سؤال تكرر أمس وقبله ، وأنا
على حطت ايدج يا حيرة ، أكتب وأمسح ، أكتب وأمسح ، أبي أقول
وأعبر ولا أقدر ، لأن إلي بـ أكتبه عن أمي .

صعب أقولج ودّي أرد المستشفى ,وأنعم في أيام صعبة لكنّها رائعة
لو أخذتها بـ النظرة الجميلة بين البنت وأمها.

ضيّعتنا الحياة و حنا قراب ، يم بعض ، نسمع ونتكلم ونتفس
بس مو مثل باجي الناس ، يمكن لأنّ الكبير عندج هو إلي يشيل نفسه
بكل شيئ حتى بعواطفه لج ، "شخليتي لاخوانج الصغار ؟" مدري
من قال حضن الأم لصغارها ولمّا يكبرون محرّم عليهم.

يمّه، صج شلت نفسي ذاكرت بروحي ، حليت مشاكلي بروحي،
طبخت شربت مشيت قعدت بروحي ، حتى حبيت بروحي ،خلقتْ
أفكاري شخصيتي  وإن كان أساسها عندج ، إلا الاختلاف
هو الي اشتركتي معاي فيه ، الاختلاف في وجهات النظر شق
أخدود عريض بينا ، خلاّني طول الوقت أتذمر بيني وبين نفسي
ولو توسعت رحت لأختي، اشتكيت منج لعقلي وظلمج وفزع قلبي
وانصفج وسحب كل الغضب وسكتني .

يمّه / ما أبالغ والله ، يوم أرتب أغراضي عشان أروح المستشفى
ما حسيت إني أبي أضمج لو ما تدخلتي ودخلتي غرفتي واستذكرتي
معاي أخاف أنسى شيء وأتوهق ، يمّه، أول مرة أشوف عيونج شايله كل هـ
الحزن، هذا كلّه عشاني.؟ بسرعه بعدت عيوني وكمّلت ترتيب جنطتي
وبسرعه ألبس وبسرعه أشيل نفسي .... وألّمج وأروح ... حضنتيني
غريبة ! .. أمي حضنتني .!

ليلة العملية ، أسمع القرآن وأهدي قلبي وأنام ، و إنتِ مستنفرة البيت كلّه
تلومينهم .. تعاتبينهم .. لو صار في بنتي شي انتوا السبب ! .. الكل ساكت
و مقدّر ..اسمعوا بَجْيِتِج .. كانوا يبون يتصلون .. ولا اقدروا .. محذرتهم
خلّوا البنيه ترتاح وراها عملية .

أول ما يابوا مريول العملية .. مدري حسيت إني أبي أكلمج أبي أقول ترى أحبج وايد
تعالي لا تخليني .. لكن أول ما سمعت صوتج.. الحبة إلي عاطوني
إياها قبل العملية بدا مفعولها ... كلماتج غير .. دعاج لحظتها غير ..
أكو أحد يحضن الثاني بصوته؟ إنتِ سويتيها ...

وتمت بحمد الله .. وطلعت .. وبـ شويت وعي شفت أبوي يمشي معاهم
للغرفة .. وبكل وعيي ..شميتج .. وحسيت بصوتج وويهج يحبني
وبطرف شيلتج تمسحين عيني اليمين تطيح 10 سنين،

وتمسحين عيني اليسار تطيح 10 ثانية ...وأظل بين ادينج بنت بو 8 سنين ..

حمدلله على سلامتج روميتي .. ارتاحي ارتاحي...

تصدقين كل الحواس ارضخت لج وارتاحت؟

شقول وإلا أقول .. أقول عن ألم زاد علي وقرروا عملية ثانية .. ومن صبري
تماسكت بس لا تدرين .. في الزيارة تظاهرت بالتحسن صامدة ومتحملة ..و

أول ما رحتي.. بجيت وبجيت .. ولا رد الألم عنّي إلا ابرة مسكن قوية حيل .. طرحتني
على الفراش مدري عن الي حولي... وبعدها بساعات .. وعيت اشوي وطلبت ربي
أشوفج .. ابي ابجي على ايدج .. حسيت في ايد تضم ايدي وتشيل الشعر عن ويهي
روميه روميه" .. يمّه صوتج .. حلم بتم محافظه عليه ما أبي أفتح عيوني"...
روميه روميه" ... وصوت ثاني "مس روميه قول لماما يروح مايصير يجي"
ممنوع ..!!" ... أبطل عيوني .. وإلا صج إنتِ عندي .. والممرضة خايفه..
مسؤولية .. أطمنج أنا بخير .. وإنتِ ييتي على قلبج :روميه مو بخير ..
تطمني يمّه .. أنا زينه وبشوفتج زينة وزينة .. والممرضة تروح وترد ..
وأنا أقنعج إني بخير .. وتطلبين أرد على التلفون لما تتصلين .. وتروحين
أطالع التلفون .. 40 مسد كول .. كلها منج ومن اخواني .. خرّعتيهم
ربي يخليج لي.

بأركض بسرعة .. أبي أوصل ليوم طلعتي ، وصلت البيت ..
دشيت دارج فاجئتج .. مستانسة إنج تحضنيني وأنا واقفة من غير شر..
وبعدها بجم يوم تكتين علي النون .. روميه مشت .. روميه قامت ومشت..
ربي لك الحمد والفضل.. غير أحبّج ما عرفت أقول ..

تسولف لي إختي .. اكتشفت انج فاهمتني وكل إلي مخالفتني فيه
عشاني وهذرتي الدايمه عندها في منها نسخة عندج .. مو تجسس
"روميه بنتي واعرفها.. اشلون مو فاهمتها .. أبيها هي تفهمني وتعرفني "..

آسفة يمّه .. طلعت أنا غلطانه .. عطيتيني مساحة واسعة .. أقول منو أنا
وشنو أبي.. ولا عطيتج لو رقعة من زمن أفهمج منها ... آسفة يمّه ..
عطيني فرصة .. أنا خذيت من حياتي فضاء .. خصصته لج ..
فضاء ما يبعدج عنّي .. فلا تبعديني عنّج .